|
|
 |
| ■兩位八十後研究員吳欣誼（右）同楊瑋婷認為，香港應改組醫委會嘅成份。 |
|
|
|
|
|
|
|
 |
 Executive日記——
黃金五十美少女 單挑醫委會怪醫
2012-06-14
女性智慧真係高！被稱「樓市大好友」的地產分析員林奮強，創辦嘅智囊機構「黃金五十」，搵咗班放洋名校八十後美少女做研究員，完成「如何為我們的將來投資一千億」嘅「巨著」研究。Kelly噚日去學吓嘢，佢哋提到投資四百億擴充醫療服務，使市民延年益壽，仲話要改革醫務委員會組成成份，因醫委會業內人士比例多，方便引入醫生，難免令人覺得「醫醫相衞」。但醫委會成員嘅蔡堅一聽到就「扯火」，話外行人唔識就唔好亂咁批評。美女與野獸，合演一場大龍鳳。 Kelly聽兩位八十後研究員吳欣誼同楊瑋婷分析，佢哋認為，香港應改組醫委會嘅成份，因為喺外國，醫委會成員都有至少三成至半數係界外人士，好似英國醫學總會就有多達一半係業外委員，香港醫委會就只有一成六係界外成員，其餘四成六係公共醫療醫生、三成八係私人執業醫生。 地區唔同做法不一 小妹問「怪醫」蔡堅醫生睇法，點知佢一聽就好「勞氣」，話若果要比較，可以同新加坡或內地比，前者醫委會一個業外人士都冇，而內地就更加連醫委會都冇啦。佢仲話，每個地區都有自己嘅背景，根本好難比。好似英國咁，佢哋基本上所有醫生都係國家包辦去聘請，差唔多冇私家醫生，所以醫委會要有一半業界人士去監察，同香港性質好唔同。 佢仲話，《基本法》賦予醫委會「專業自主」，唔係話增加業外人士就一定好，始終醫生係最熟悉行內運作，由政府操控仲弊喎。 怪醫發火一早預咗，兩個美少女話佢哋唔會驚。佢哋睇得又講得，有冇應徵吓梁朝嘅政助大軍呢？ KellyChu |
